Ispoortiin Damee Guddaa Walitti Dhufeenya Gaarii Hawaasaa Ijaaruu Danda'uudha
Deetaan Ministirri Aadaa fi Ispoortii Biyyoolessaa Kabajamoo obbo Makkiyuu Mohaammad akka ibsanitti, ispoortiin obbolummaa fi waliigaltee uummataa cimsuun, walqunnamtii hawaasummaa keessatti seeneffama walitti hidhame ijaaruu kan danda’u damee guddaa dha.
yaada isaanii kana kan ibsan sagantaa jalqabsiisa dorgommii Biskileetii maawunteenii Magaalaa irratti argamuun yoo ta’u, ispoortiin uummata gara garaa walitti fiduun tokkummaa fi waliin jireenya nagaa dagaagsuu keessatti shoora guddaa akka qabu ibsaniiru.
Itti aansuunis mootummaa Itiyoophiyaa yeroo ammaa biratti misoomni ispoortii xiyyeeffannoo olaanaa argachaa jira. Bu’uuraaleen ispoortii babal’achaa jiru, akkasumas kallattiin hojii ifaa fi tarsiimoon diriirfamaa jiru.
Dabalataanis, labsiin Imaammata Ispoortii fi Bulchiinsa Misooma Ispoortii yeroo dhihoo asitti ragga’e, hirmaannaa hawaasaa fi fayyadamummaa ispoortii cimsuuf hojii bal’aan hojjetamaa jiraachuu kan agarsiisu ta’uu himaniiru.
Keessumaa magaalaan Finfinnee taateewwan ispoortii idil-addunyaa keessummeessuu ishee irraa bu’aa guddaa argachaa jiraachuunis ibsameera. Kunis hojii mootummaa gama kanaan hojjetamaa jiru bu’a qabeessa ta’uu isaa kan mul’isu dha.
Dorgommiin Biskileetii Maawunteenii Magaalaa kunis, suuraa gaarii biyya keenyaa addunyaatti beeksisuu keessatti gahee olaanaa qabaachuu isaa himaniiru. Akkasumas, ispoortistoonni biyya keessaa muuxannoo idil-addunyaa argachuuf carraa bal’aa akka itti argatan ibsameera.
Mootummaan faayidaa ispoortiin dinagdee, dippilomaasii, hawaasummaa fi nageenya irratti qabu hubachuun, ispoortii akka meeshaa misoomaatti fayyadamuuf tattaaffii cimaa gochaa jira.
Dorgommiin kunis garee adda addaatiin gaggeeffamaa jira; fiigichi km 20 irratti dhiiraa fi dubartoonni, dargaggoonni fi muuxannoo qaban hirmaachaa jiru.
Dorgommiin Biskeeleetii Maawunteenii Magaalotaa Idil-addunyaa kun boru Muuziyeemii Adwaatti kan itti fufu yoo ta’u, biskileetoonni biyyoota adda addaa irraa 135 ol ta’an irratti hirmaachaa jiru.
