Mootummaan Naannoo Oromiyaa Kenna Tajaajilaa Foyyeessuudhaan Rakkoo Bulchiinsa Gaarii Bu'uura Irraa Akka Furamuuf Hojiile Bu'aa Qabeessa Hojjechaa Jira. Keessumaa Kenni Tajaajilaa Si'ataa, Qulqulluufi Karaa Ammayyaa'aa Ta'een Akka Kennamuuf Wiirtuu Tajaajila Tokkoffaa ( Masoob) Magaalota Oromiyaa Keessatti Akka Hundeeffamu Gochuudhaan Hojii Bal'aan Hojjetamaa Jira.
Yaadamni haaraan
kun qaawwa mootummaa fi ummata gidduu jiru dhiphisuun itti quufiinsaaafi
amantaa ummanni mootummaa irraa qabu dabaluufi hanna hambisuu keessatti shoora
olaanaa kan qabu yoo ta’u, dabalataanis tajaajila teknoolojiin deeggarameefi
hawwataa ta'e hawaasaaf dhiyeessuuf akka meeshaa jijjiiramaa tokkootti
tajaajila.
Haaluma kanaan
guyyaa har'aa magaalaa Mojootti Wiirtuun Tajaajila Tokkooffaa bakka
Pirezidaantii itti aanaa Mootummaa Naannoo Oromiyaa Obbo Awwaluu Abdii
argamanitti tajaajilaaf banaa ta'ee jira.
Obbo obbo
Awwaluu Abdii saganticha irratti haasaa taasisaniin hojiilee gurguddoo
mootummaa jijjiiramaatiin hojjetamaa jiran keessaa tajaajilli uummataaf kennamu
haqa qabeessa, qaqqabamaafi ammayyaa'a akka ta'uuf Wiirtuu Tajaajila Tokkoffaa
magaalota Oromiyaa keessatti akka hundaa'u gochuudhaan hojii bu'a qabeessi
hojjetamaa jiraachuu himaniiru.
Wiirtuun
Tajaajila Tokkooffaa hundaa'uun qaawwa mootummaa fi ummata gidduu jiru
dhiphisuun itti quufinsaa fi amantaa ummanni mootummaa irraa qabu akka dabalu
gochaa jira jedhan.
Dabalataanis
uummati keenya jijjiiramaan dura tajaajila argachuuf gidiraa hedduu dabarsaa
kan ture, yeroo ammaa mootummaan hawaasa boqochisuuf kenna tajaajilaa
foyyeessuuf hojii xiyyeeffannoon hojjetamaa jiruun rakkoo bulchiinsa gaarii
bu'uura irraa furmaata akka argatu gochaa jira jedhan.
Kantiibaan
magaalaa Mojoo Obbo Gaazaalii Hashuu gamasaaniitiin mootummaan jijjiiramaa
gaaffilee uummataa roga hundaan deebisuuf hoji bu'a qabeessa hojjechaa
jiraachuu himanii, hojiilee kana keessaas tajaajilli mootummaan uummataaf kennu
si'ataa, qulqulluufi ammayyaa'a akka ta'uuf Wiirtuu Tajaajila Tokkooffaa
hundeessaa jira jedhan.
Bu'uuruma kanaan Wirtuun Tajaajilaa tokkoffaa magaalaa Mojootti har'a eegalchiifame kunis tajaajilawwan 106 kan kennu ta'uu ibsanii, sektaroonni 23 wiirtuu kanatti tajaajila kan kennan ta'uus himaniiru. Wiirtuun kunis ji'oota sadii gidduutti ijaaramee xumuramuus obbo Gazaalii Hashuu eeraniiru.
